19 manifestime kundër racizmit në Bernë

Dje në Bernë ka filluar java e parë e aksionit kundër racizmit. Java e aksionit kundër racizmit zgjatë deri më 21 mars dhe do të përcillet me manifestime të ndryshme si: koncerte, shfaqje në rrugë, ekspozita dhe aksione tjera. Qëllimi i aksionit është sensibilizimi i njerëzve në lidhje me racizmin dhe diskriminimin. Aksionin e qytetit të Bernës e mbështesin këshillimoret e ndryshme dhe njerëz të njohur nga kultura, sporti dhe politika.

Bernë. Deri më 21 mars do të zhvillohen 19 aktivitete të ndryshme mbi temën racizmi dhe diskriminimi  Qendra e kompetencës për Integrim i qytetit të Bernës, shoqata, organizata të lagjeve dhe personat e angazhuar kanë përpiluar një program të larmishëm: “librat e gjallë” informojnë mbi përvojat e tyre me racizmin dhe diskriminimin.

Fëmijët dhe të rinjtë me prapavijë të migracionit japin koncerte në sheshin “Casinoplatz”. Pastaj do të bëhen edhe biseda me lojtarët e ekipit të futbollit “Young Boys nga Berna, referate të ndryshme dhe aksione të cilat do të ndriçojnë nga të gjitha këndvështrimet aspektet e ndryshme të racizmit dhe diskriminimit.

Më 19 mars do të bëhet një marsh në formë të yllit, ku njerëz nga vende të caktuar të qytetit tubohen dhe prej aty ecin drejt vendit të tubimit ku edhe do të mbahet manifestimi qendrorë.  Programin e hollësishëm e gjeni në faqen: www.bern.ch/gegenrassismus dhe në Facebook: „Aktionswoche der Stadt Bern gegen Rassismus”.

Pjesë e një koalicioni kundër racizmit

Prej vitit 2009, qytetit i Bernës është anëtarë i Koalicionit Evropian kundër Racizmit. Koalicioni në fjalë është pjesë e rrjetit ndërkombëtarë të nisur nga UNESCO të qyteteve, të cilat së bashku angazhohen kundër racizmit, diskriminimit dhe armiqësisë ndaj të huajve. Në Zvicër, përveç Bernës në koalicion marrin pjesë edhe  qytetet Lozana (Lausanne), Gjeneva (Genève), Winterturi (Winterthur) dhe Cyrihu (Zürich).