Zvicër: Zgjatet orari i punës dhe ulen rrogat?

Po vazhdoi frangu të mbetet i fortë, kërcënojnë madje edhe pushimet nga puna dhe bartja e prodhimit jashtë Zvicrës

Federata zvicerane e punëdhënësve (SAV), në dritën e krizës nëpër të cilën po kalon ekonomia, si pasojë e frangut të fortë, po merr në shqyrtim uljen e pagave dhe zgjatjen e orarit të punës për të punësuarit. Po kështu, punëtorët nga zonat kufitare të vendeve që kufizojnë Zvicrën, do të paguheshin me euro e jo me franga. Ajo ka kërkuar “më shumë hapësirë veprimi për ndërmarrjet në masat që ato marrin lidhur me personelin”.

Po vazhdoi frangu të mbetet i fortë, kërcënojnë madje edhe pushimet nga puna dhe bartja e prodhimit jashtë Zvicrës, ka thënë kryetari i SAV Valentin Vogt sot në Bernë, njofton sf1.

Masat e lartpërmendura do të ishin vetëm masa emergjente, thonë në SAV. Pastaj, masat lidhur me personelin do të ishin vetëm “pjesë përbërëse e një pakoje koherente masash”.

Që masat në dëm të të punësuarve të mos merren fare parasysh, sipas SAV nevojitet një kurs i frangut në raport me euron prej 1.30 deri në 140 franga. Vetëm në një rast të tillë, pjesa më e madhe e eksporteve dhe turizmit zviceran do të kishin sërish aftësi konkurruese.