70 ditë më shumë në paraburgim, kantoni i Valisit duhet t’i paguajë 10,500 franga një të dënuari

Një 37-vjeçar polak, i dënuar për trafik droge në Zvicër, do të marrë 10,500 franga kompensim nga kantoni i Valisit, pasi ka qëndruar 70 ditë më gjatë në paraburgim sesa duhej.

Rasti, për të cilin raportoi gazeta zvicerane Walliser Bote, lidhet me një vendim të Gjykatës së Qarkut në Visp. Vendimi ende nuk është i formës së prerë.

Ngjarja nisi në vjeshtën e vitit 2025, kur policia zvicerane kishte vëzhguar për disa javë një banesë në Visp, ku kishte vënë re hyrje-dalje të shpeshta të personave. Sipas raportimeve, 37-vjeçari, i cili punonte si montues skelash, ishte parë pothuajse çdo ditë duke lëvizur me skuter elektrik dhe duke takuar persona të ndryshëm.

Në banesë u gjetën qindra gramë drogë

Më 12 nëntor 2025, policia kreu një kontroll në banesë. Gjatë bastisjes u sekuestruan, ndër të tjera, rreth 390 gramë marihuanë, afro 100 gramë klefedron dhe 31 gramë ekstazi.

37-vjeçari u arrestua dhe u vendos në paraburgim po atë ditë.

Prokuroria kërkoi një dënim prej 18 muajsh burgim, si dhe dëbimin e tij nga Zvicra për pesë vjet, duke e akuzuar për trafik të rëndë të lëndëve narkotike.

Megjithatë, gjykata arriti në një përfundim tjetër. Sipas saj, provat nuk ishin të mjaftueshme për ta cilësuar rastin si trafikim të rëndë droge.

Dëshmitë e dy bashkëpandehurve nuk mund të përdoreshin

Një problem i rëndësishëm në proces lidhej me dëshmitë e dy bashkëpandehurve. Sipas Walliser Bote, deklaratat e tyre nuk mund të përdoreshin si prova, pasi i akuzuari nuk kishte pasur mundësi t’i përballte ata me deklaratat e dhëna.

Megjithatë, gjykata konsideroi të provuar se 37-vjeçari kishte kryer trafik droge. Në këtë përfundim ndikuan gjurmët e ADN-së të gjetura në paketimet e drogës, fotografitë në telefonin e tij, mesazhet në aplikacionet e komunikimit dhe transaksionet me para në dorë.

Gjykata e dënoi atë me 190 ditë burgim me kusht për dy vjet, si dhe me një gjobë prej 1,000 frangash zvicerane. Ndryshe nga kërkesa e prokurorisë, ndaj tij nuk u vendos dëbimi nga Zvicra.

Kishte qëndruar 70 ditë më shumë në paraburgim

Në kohën kur u mor vendimi, 37-vjeçari kishte kaluar gjithsej 309 ditë në paraburgim.

Sipas llogaritjes së gjykatës, duke marrë parasysh edhe dënime të tjera, atij duhej t’i njiheshin vetëm 239 ditë paraburgim.

Për 70 ditët e kaluara më tepër pas hekurave, kantoni i Valisit duhet t’i paguajë atij 10,500 franga kompensim.

Në të njëjtën kohë, 37-vjeçari është urdhëruar të paguajë 10,220.60 franga shpenzime gjyqësore. Dy shumat nuk mund të kompensohen me njëra-tjetrën.

Vendimi i Gjykatës së Qarkut në Visp nuk është ende përfundimtar.

---