Evropa po e ngadalëson Inteligjencën Artificiale

Rreth 72% e kompanive të eurozonës thonë se do të përdorin burime të brendshme, si flukset e parave dhe fitimet e pashpërndara, për investimet në inteligjencën artificiale

Kompanitë në eurozonë po investojnë në inteligjencën artificiale kryesisht me fondet e tyre, ndërsa përballen me vështirësi për të siguruar financim të jashtëm, sipas të dhënave të publikuara në një blog të Bankës Qendrore Evropiane.

Ndryshe nga kompanitë e mëdha amerikane të teknologjisë, të cilat po marrin hua në përmasa të mëdha për të financuar zgjerimin në AI, kompanitë evropiane po ecin me ritme më të moderuara. Rreth 72% e kompanive të eurozonës thonë se do të përdorin burime të brendshme, si flukset e parave dhe fitimet e pashpërndara, për investimet në inteligjencën artificiale, shkruan Scan, transmeton albinfo.ch.

Vetëm 16% planifikojnë të përdorin kredi bankare, ndërsa rreth 6% përmendin kapitalin aksionar dhe fondet e investimit. Vetëm 1% e kompanive po shqyrtojnë financimin përmes titujve të borxhit.

Sipas analizës, kjo varësi e lartë nga paratë e kompanive ngre pikëpyetje mbi pengesat që ekzistojnë në sistemin financiar evropian. Problemi duket veçanërisht i rëndësishëm për investimet në teknologji dhe aktive të paprekshme, të cilat janë më të vështira për t’u përdorur si kolateral për kredi.

Në SHBA, ndërkohë, gjigantët e teknologjisë po investojnë qindra miliarda dollarë në zgjerimin e kapaciteteve të lidhura me AI dhe po përdorin gjithnjë e më shumë tregjet e borxhit për të financuar këto projekte.

Të dhënat tregojnë gjithashtu se mbi 80% e kompanive evropiane planifikojnë të përdorin vetëm një burim financimi, kryesisht fondet e tyre. Sipas analizës së publikuar nga BQE, kjo mund të sinjalizojë një problem më të gjerë për Evropën në sigurimin e kapitalit të nevojshëm për të konkurruar në garën globale të inteligjencës artificiale.

---