Votojnë serbët në Kosovë, përdorin simbolet e Serbisë

Përkrah simboleve të OSBE-së, simbolet shtetërore të Serbisë janë vendosur në qendrat e votimit në Kosovë

Përkundër paralajmërimeve të OSBE-së në Kosovë, i cili organizon zgjedhjet presidenciale dhe parlamentare të Serbisë për serbët,  se në qendrat e votimeve nuk do të ketë simbole serbe, ato janë parë në disa prej këtyre qendrave.
Raportohet  se në qendrën e votimit në shkollën fillore ‘Sveti Sava’ në veri të Mitrovicës, pranë shenjës së OSBE-së ka qenë i vendosur edhe flamuri i shtetit të Serbisë.

Ndërkohë në Zveçan dhe Zubin Potoku, diku rreth 100 metra  në afërsi të qendrave të votimit të OSBE-së janë të vendosur edhe qendrat e votimeve të grupeve ilegale serb të cilat votojnë për pushtetin lokal. 
gjithashtu mediat kosovare, raportojnë se në veri të Mitrovicës pak pas mesditës, janë dëgjuar të shtëna me armë zjarri.

Zyrtarë të të policisë në Mitrovicë kanë theksuar se policia nuk ka informacione për të shtëna me armë të zjarrit, të dëgjuara në veri.

Ndërkohë shefi i misionit të OSBE-së në Kosovë, ambasadori Uerner Almhofer, ka vizituar vendvotimet në Graçanicë dhe Llapna Sellë, ku pjesëmarrja e qytetarëve serbë në zgjedhjet e Serbisë thuhet të jetë e lartë. 

“Gjithçka po zhvillohet në mënyrën më të mirë. Njerëzit votojnë. Kur kemi arritur në Graçanicë, ka pasur disa votues; kur jemi kthyer, ka ardhur një grup i tërë. Në Llapna Sellë ka pasur tollovi para vendvotimeve”, ka theksuar për Radion Evropa e Lirë zëdhënësi i misionit të OSBE-së, Nikolla Goan.

Ky mision ka vënë në pahë se, nuk janë shënuar raste të votimeve për zgjedhjet lokale të Serbisë, në lokacionet ku po mbahen ato parlamentare dhe presidenciale.

 Rreth 109 mijë qytetarë serbë të Kosovës kanë të drejtë vote në zgjedhjet parlamentare dhe presidenciale të Serbisë, që po lehtësohen nga OSBE-ja.