Veteranët: miratojeni ligjin, ndërprejmë grevën

Veteranët ia kanë bërë me dije shefit të ekzekutivit se ata do të ndërpresin grevën vetëm pasi që Kuvendit të miratojë ligjin

Kryetari i Këshillit për Mbrojtjen e të Drejtave të Luftëtarëve të Ushtrisë Çlirimtare, Xhevdet Qeriqi, ka thënë se kanë pasur një takim me kryeministrin Hashim Thaçi, i cili ka kërkuar ndërprerjen e grevës, por veteranët ia kanë bërë me dije shefit të ekzekutivit se ata do të ndërpresin grevën vetëm pasi që Kuvendit të miratojë ligjin.

Siç raporton RTV21, Qeriqi është shprehur se grevistët besojnë se ligji për vlerat e luftës do të kalojë në parlament javën e ardhshme, mirëpo, sipas tij, arsyeja e vazhdimit të grevës është frika se miratimi i ligjit mund të zvarritet.

“Jo, ne i besojmë qeverisë dhe e falënderojmë për këtë vendim që e ka marrë që ligji të shkojë në parlament, mirëpo kanë kaluar 12 vjet dhe mund në njëfarë forme mund të zvarritet ligji, dhe për këtë arsye po kërkojmë që sa më shpejt të miratohet”, ka deklaruar Qeriqi.

Njëzet e tetë ditë pas hyrjes në grevë rreth 100 veteranë të luftës qëndrojnë në tendat e vendosura afër Qeverisë së Kosovës, ndërkohë që gjendja e tyre shëndetësore po përkeqësohet nga dita në ditë.