Vazhdojnë të jenë të mbyllura pikat kufitare në veri

Në Rudare ku është e vendosur barrikada kryesore nga serbëy në veri të Kosovës, nata ka kaluar e qetë dhe pa ndonjë incident.

Pikat kufitare Jarinje dhe Bërnjak vazhdojnë të mbeten të mbyllura. Natë e qetë ka qenë edhe në fshatin Zupç afër Zubin Potokut.

Gjatë natës është vërejtur një numër më i madh i serbëve në barrikadat që janë vendosur në drejtim të Jarinjes.

Bëhet e ditur se forcat e KFOR-it nuk i kanë vizituar barrikadat gjatë natës asnjëherë.

Për shkak të mbylljes së pikave kufitare 1 dhe 31 nga ana e KFOR-it, mallrat nga Serbia nuk po arrin në komunat veriore me popullatë serbe, kështu që është dita e tretë që buka dhe qumështi nuk po arrin në veri të Mitrovicës dhe Leposaviq.

Nga ana tjetër ministri i Punëve të Brendshme Bajram Rexhepi ka deklaruar se situata në pikat kufitare 1 dhe 31 në veri vazhdon të jetë e qetë.

Rexhepi ka bërë të ditur se në pikën 31 funksionon dogana dhe policia kufitare e Kosovës, ndërsa Jarinja është e bllokuar për automjete të rënda dhe aty bëhet vetëm lëvizja e qytetarëve nën kontroll të rreptë.

Sipas tij, policia në këto raste nuk përzihet për arsye se përgjegjësinë e kanë KFOR-i dhe EULEX-i, ndërsa nëse një gjë e tillë kërkohet nga policia, ajo do të jetë e gatshme.