Urdhërarrestim ndërkombëtar për gjashtë serbë të veriut

Emrat e të dyshuarve për vrasjen e policit Enver Zymeri shpejt pritet të shfaqen në faqen zyrtare të Interpolit.

Prokuroria e Qarkut e Mitrovicës ka bërë kërkesë në Gjykatë për lëshimin e fletarrestimit ndërkombëtar dhe pritet që ditët në vazhdim të nënshkruhet nga një gjyqtar për t’u adresuar pastaj në sekretariatin e Interpolit në Lyon të Francës, ka bërë të ditur një burim nga Gjykata.

Kërkesën e Prokurorisë e ka konfirmuar, edhe kryeprokurori Shyqyri Syla, shkruan Koha Ditore.

Kërkimet në Kosovë për arrestimin e tyre nuk kanë dhënë rezultat deri tash, derisa urdhri për arrestim është lëshuar pesë javë më parë nga Gjykata e Qarkut e Prishtinës. Burime nga Policia thonë se të kërkuarit Ratomir Bozhoviq i njohur si “Dude”, Radovan Radiq, Milovan Vlashkoviq, Slobodan Vuçiniq, Dushan Jovanoviq dhe Ratomir Kasaleviq nuk ndodhen në Kosovë, por fshihen diku në Serbi. Ky fakt, sipas këtij burimi, është i mjaftueshëm që Gjykata të lëshonte një urdhërarrestimi ndërkombëtar, çka do ta detyronte edhe Serbinë si anëtare e Interpolit të kryente kërkime për arrestimin e tyre.

Policia e Kosovës dhe ajo e EULEX-i disa javë rresht ishin vënë në ndjekje të gjashtë të dyshuarve për vrasjen e policit Enver Zymeri, më 26 korrik, në veri. Vrasja e tij pati ndodhur një ditë pas nisjes së aksionit për vënien e kontrollit në dy pikat kufitare atje. Urdhrin e arrestimit të tyre e pati lëshuar Gjykata e Qarkut e Mitrovicës me kërkesë të Prokurorisë.

Prej vrasjes së policit Zymeri katër muaj më parë, situata në veri të Kosovës nuk ka ndryshuar shumë. Serbët lokalë të mbështetur nga strukturat shtetërore që veprojnë edhe në Kosovë po vazhdojnë të kundërshtojnë shtrirjen e autoriteteve shtetërore në atë pjesë të Kosovës. Përpjekje të shumta të mbetura në tentativë për zhbllokimin e rrugëve janë bërë gjatë kësaj jave.