Universiteti i Prishtinës nënshkroi marrëveshje me Zvicrën, hapet program i ri

Një marrëveshje që synon avancimin e edukimit për të drejtat e njeriut është nënshkruar sot në Prishtinë mes Universitetit të Prishtinës “Hasan Prishtina” dhe Konfederatës Zvicerane.

Kjo do të konkretizohet përmes një programi të akredituar në UP, i cili do të jetë në gjuhën angleze.

“Nuk ka asnjë program të akredituar të arsimit të lartë që merret me të drejtat e njeriut në Kosovë si dhe në vendet e tjera të Ballkanit Perëndimor. Pasja e këtij programi në Kosovë do t’u mundësojë të diplomuarve të këtij programi që të kontribuojnë në shoqëri në këtë fushë”, tha rektori UP-së, Qerim Qerimi.

Ndërsa Avni Puka, dekan i Fakultetit Juridik, bëri të ditur se në kuadër të ligjëratave ndërkombëtare, tre mësimdhënës nga universitetet prestigjioze zvicerane në Gjenevë dhe Lozanë kanë konfirmuar se do të marrin pjesë në zbatimin e programit master si ligjërues të ftuar, mentorë dhe hulumtues.

Në nënshkrimin e këtij bashkëpunimi, Zvicrën e përfaqësoi Sarah Jaquiery, Sekretarja e Parë, Këshilltare për të Drejtat e Njeriut në Ambasadën e Zvicrës dhe Ljubisha Bascareviq nga Këshilli i Evropës.

---