Ujë Kllokoti edhe në Zvicër

Udhëheqja e fabrikës "Kllokot" ka njoftuar ministrin Beqaj se uji mineral i Kllokotit ka nisur të eksportohet në Zvicër dhe Arabinë Saudite

Politikat e Qeverisë favorizojnë biznesin vendës

　

Qeveria e Kosovës do të vazhdojë me investimet e saj kapitale të cilat në mënyrë direkte ndikojnë në zhvillimin e ndërmarrjeve dhe hapjen e vendeve të reja të punës, ka deklaruar ministri i Zhvillimit Ekonomik Besim Beqaj.

　

Këto komente Beqaj i bëri me rastin e inaugurimit të linjës të prodhimit të mburojave metalike të rrugëve në fabrikën Vinex në Viti, ku të pranishëm ishin edhe zv.kryeministrja Mimoza Kusari-Lila, kreu i Odës Ekonomike, Safet Gërxhaliu, kryetari i Komunës, Nexhmedin Arifi dhe përfaqësues të USAID-it dhe GIZ-it.

　

Beqaj ka thënë se investimi në fabrika të tilla siç është “Vinex” çon drejt realizimit të përkushtimit të Qeverisë së Kosovës për të krijuar një ambient më të mirë për sektorin privat, e veçanërisht për prodhuesit.

　

Ai ka theksuar se Qeveria do të vazhdojë të avancojë bazën ligjore dhe përshtatjen e politikave fiskale me interesat e biznesit në funksion të zhvillimit ekonomik të vendit, respektivisht interesave të qytetarëve.

　

Nga ana tjetër, ministrja e Tregtisë dhe Industrisë, Mimoza Kusari – Lila ka thënë e se Qeveria e Kosovës me hapat që ka ndërmarrë kohëve të fundit ka treguar se prodhuesit vendor mund të konkurrojnë si në tregun e vendit ashtu edhe në ato rajonale　 me të gjithë prodhuesit tjerë.

　

Ndërkaq, kreu i OEK-ut, Safet Gërrxhaliu ka vlerësuar investimet e Vinex si një kontribut në ekonominë e vendit dhe një partneritet i suksesshëm me USAID dhe GIZ, ndërsa vlerësoi edhe përkrahjen e Qeverisë, respektivisht resorëve që mbulojnë këtë fushë.

　

Edhe përfaqësuesit e USAID-it dhe GIZ-it kanë vlerësuar se Vinex është një storie e suksesshme e një ndërmarrje shoqërore të privatizuar, e cila arriti të kalojë sfidat të rris investimet dhe numrin e të punësuarve.

　

Ministri Beqaj ka vizituar edhe fabrikën e ujit “Kllokot”. Qeveria e Republikës së Kosovës është duke përmirësuar politikat fiskale në favor të biznesit vendor me synim të heqjes të gjitha barrierave potenciale për zhvillimin e sektorit privat, ka deklaruar ministri i Zhvillimit Ekonomik, Besim Beqaj.

Kryetari i Bordit të Fabrikës “Kllokot”, Adil Reshani dhe Drejtori Gjeneral, Fatmir Reshani e kanë njoftuar ministrin Beqaj me gjendjen e fabrikës dhe afarimin e saj në vend dhe më gjerë.

　

Kreu i Bordit, Adil Reshani ka theksuar se produktet e fabrikës “Kllokot” janë me standarde ISO dhe tashmë kanë nisur të eksportohen në Zvicër dhe Arabinë Saudite, ndërkaq është finalizuar edhe një kontratë me KFOR-in gjerman.

　　　　　　　　　

Drejtuesit e fabrikës “Kllokot” kanë bërë të ditur se kapacitetet prodhuese të kësaj fabrike janë 7500 litra në orë me mundësi të lëshimit edhe të një linje prodhimi me 5000 litra në orë.

 

---