Themelohet njësiti ILECU në kuadër të policisë

Është themeluar Njësiti për Koordinim Ndërkombëtar për Zbatim të Ligjit – ILECU, në  kuadër të Policisë së Kosovës. Ministri i Brendshwm, Bajram Rexhepi, ka vlerësuar bashkëpunimin ndërkombëtar si çelësin kryesor për luftimin e krimit të organizuar.

Rexhepi, tha se marrëveshjet e shumta të nënshkruara për bashkëpunim me shtete të rajonit dhe të Evropës po japin rezultatet e pritura, ndërsa ka garantuar për mbështetjen e qeverisë.

Drejtori i Përgjithshëm i Policisë Austriake, Herbert Anderl, është shprehur i kënaqur që rrjeti i ILEC-ut, është zgjeruar edhe në Kosovë. “Bashkëpunimi ndërkombëtar dhe shkëmbimi i informacioneve, është lufta më e madhe që mund të bëjmë kundër krimit të organizuar”, ka thënë Anderl.

Për themelimin e këtij njësiti në Kosovë, Drejtori i Policisë, Reshat Maliqi, tha se është benefit për të gjitha institucionet dhe agjencitë, që punojnë për zbatimin e ligjit.