Thaçi: doganierët tanë janë vendosur në veri

Kryeministri Thaçi ka thënë se në pikat 1 dhe 31 janë vendosur doganierë kosovarë, përfaqësues të EULEX-it dhe pjesëtarë të KFOR-it

Kryeministri Hashim Thaçi gjatë mbledhjes së sotme të qeverisë ka konfirmuar se plani operacional për rikthimin në funksion të pikave doganore 1 dh 31 ka përfunduar me sukses. Ai ka thënë se atje janë vendosur doganierë kosovarë përfaqësues të EULEX-it dhe pjesëtarë të KFOR-it, njofton indeksonline.net.

Thaçi ka folur edhe për bllokimin e rrugëve që kanë bërë serbët, ndërsa potencoi se kjo nuk është mënyra më e mirë për të ecur përpara.　 Ai nuk dha ndonjë detaj se cilët do të jenë hapat e ardhshëm pas vendosjes në pikat kufitare.

Partia më e madhe opozitare, LDK, ka dalë në mbështetje të veprimeve të sotme të qeverisë së Kosovës dhe të faktorit ndërkombëtar drejt vendosjes së rendit në veri.

“Lidhja Demokratike e Kosovës mbështet veprimet e institucioneve të Republikës së Kosovës dhe të pranisë ndërkombëtare, për vënien nën kontroll të pikave kufitare në Veri të vendit. Lidhja Demokratike e Kosovës kërkon nga këto institucione që veprimet të jenë të kooordinuara mirë dhe të shoqëruara me vendosmëri. LDK i konsideron veprimet e sotme si veprime fillestare për të vënë rend dhe rregull në Veri.”, thuhet në një njoftim për medie të dërguar nga LDK. .

Ndërkohë, fuqia e dytë opotzitare, Lëvizja Vetëvendosje ka kritikuar qasjen e Qeverisë së Kosovës në veri të vendit.