SVP kundër zgjatjes së misionit të SWISSCOY-t në Kosovë

Me qëndrimin e saj, SVP po bie në kundërshtim edhe me vetë ministrin e mbrojtjes Ueli Maurer, i cili vjen nga kjo parti

Partia më e madhe zvicerane, Partia Popullore e Zvicrës (SVP) është shprehur të shtunën kundër zgjatjes së qëndrimit të trupave zvicerane, Swisscoy, në Kosovë deri në fund të vitit 2014, siç është propozuar nga Qeveria Federale. Kërkesa e SVP-së do të shqyrtohet në sesionin veror të Parlamentit Nacional që fillon më 31 maj.

Angazhimi ushtarak në Kosovë, shikuar nga aspekti i politikës së migrimit, nuk ka më ndonjë kuptim, ka njoftuar fraksioni i SVP-së në parlamentin e Zvicrës, raporton nzz.ch. Për këtë arsye, Zvicra duhet ta përfundojë më në fund misionin e saj atje.

Me qëndrimin e saj, SVP po bie në kundërshtim edhe me vetë ministrin e mbrojtjes Ueli Maurer, i cili vjen nga kjo parti. Ai jo vetëm që qëndron mbrapa zgjatjes së mandatit të Swisscoy-t në Kosovë por ka propozuar madje edhe mundësinë e rritjes në numër të këtij misioni.

Dhoma e kantoneve e Parlamentit Nacional në sesionin dimëror e pati miratuar me 29 vota pro, asnjë kundër dhe një të përmbajtur, zgjatjen e misionit të Swisscoy në Kosovë.

Swisscoy, si pjesë e trupave multinacionale të KFOR-it, gjendet në Kosovë që nga viti 1999. Nga fillimi e deri më tash në këtë mision kanë marrë pjesë vullnetarisht 4200 pjesëtarë të forcave ushtarake zvicerane. Duke filluar nga viti 2002 Swisscoy është i armatosur për vetëmbrojtje.