Sulmi ndaj Editës, akt huliganizmi, thotë ekzekutivi

"Ky sulm, i kryer nga individë të "Vetëvendosjes", është një akt politikisht i papërgjegjshëm dhe në kundërshtim me ligjin"

Qeveria e Kosovës, ka reaguar ndaj sulmit drejtuar zv.kryeministres Edita Tahiri. Në reagim, qeveria e quan aksionin e Vetëvendosjes e vandal dhe vepër huliganësh.

“Qeveria e Republikës së Kosovës shpreh indinjatën dhe dënon fuqimisht manifestimin e dhunës dhe vandalizmit ndaj zëvendëskryeministres së Qeverisë së Republikës së Kosovës, në Aeroportin Ndërkombëtar “Adem Jashari” të Prishtinës, pas kthimit nga Brukseli”, thuhet në reagimin e qeverisë.

Sipas saj, ky sulm, i cili është kryer nga individë të deklaruar si aktivistë të Lëvizjes politike “Vetëvendosje”, është një akt politikisht i papërgjegjshëm dhe në kundërshtim me ligjin.

“Ky akt është vandal dhe manifestim huliganizmit për qëllim të përfitimit politik.”, thotë ekzekutivi.

Në reagim thuhet se Qeveria do të vazhdojë me dialgun me Serbinë, sepse sipas saj, kjo do të çojë në njohjen e Kosovës nga ana e Beogradit.

Qeveria thotë se sundimi i rendit dhe ligjit në Kosovë nuk ka alternativë dhe se “ata që kundërshtojnë këtë, pavarësisht se nga vijnë, nuk do të kenë perspektivë në shtetin e lirë dhe demokratik të Kosovës.”