Situata në veri ka filluar të bëhet e padurueshme

Pjesëtarë të KFOR-it me një aksion të shpejtë kanë zgjeruar zonën e sigurisë në pikëkalimin kufitar Jarinje dhe kështu praktikisht kanë pushtuar barrikadën serbe të vendosur aty në natën e 15 e 16 shtatorit.

KFOR-i e bëri këtë zgjerim vetëm 10 minuta pas vizitës së shefi të UNMIK Farid Zarif në vendkalimin Jarinje, bëjën të ditur mediat serbe. Serbët që ishin afër barrikadës, u tërhoqën.

KFOR-i t ka vendosur shenjat e tërheqjes së vërejtjes, udhëzimet nga duhet të qarkullojnë automjete dhe po fton qytetarët që të mos i afrohen zonës.

Qytetarët serbë, pastaj, me dy kamionë ngritën një barrikadë të re në rrugën magjistrale që dërgon në Jarinje.

Kurse ministri i Punëve të Brendshme, Bajram Rexhepi, ka thënë se çdo veprim për largimin e barrikadave të vendosura nga serbët e rebeluar në veri do të bëhet në koordinim me EULEX-it dhe KFOR-in.

Rexhepi ka theksuar ka bërë të ditur se çdo veprim lidhur me veriun do të bëhet në koordinim me misionet ndërkombëtare në Kosovë.

Ai ka theksuar se si pasojë e gjithë kësaj gjendja në veri është rënduar dhe se qytetarët kanë mbetur peng të grupeve kriminale serbe në këtë pjesë të vendit.

Ndërsa kryetari i Mitrovicës, Avni Kastrati, ka pritur në takim zëvendëskryeministrin e Kosovës dhe njëherit ministrin për Administrimin të Pushtetit Lokal, Sllobodan Petroviq, me të cilin ka biseduar për gjendjen aktuale në Mitrovicë, me theks të veçantë për situatën e sigurisë në veri.

Kastrati ka bërë të ditur se hapat për normalizimin e situatës në veri që janë ndërmarrë nga institucionet vendëse në koordinim me ato ndërkombëtare janë inkurajuese për normalizimin e jetës në këtë pjesë të vendit.

Kurse, zëvendëskryeministri Petroviq e ka vlerësuar jetike normalizimin e gjendjes vendosjen e rendit dhe ligjin.

“Barrikadat e vendosura në veri janë duke shkaktuar probleme më të mëdha dhe vështirësi për vetë qytetarët serbë”, ka thënë ai.

Petroviq ka dënuar sulmin që ka ndodhur në veri të Mitrovicës kundër punëtorëve që ishin duke pastruar brigjet e Ibrit në kuadër të një projekti të financuar nga USAID-i.

Sipas tij, për normalizimin e situatës është e rëndësishme që paraprakisht të izolohen grupet dhe personat e kriminalizuar në veri.