Shqipëria në presion nga Banka Botërore

Ministri shqiptar i financave u ka paraprirë, edhe ai publikisht, kushteve që kërkon Banka Botërore

Dalja e ekspertëve të Bankës Botërore në publik në mes të negociatave me Ministrinë e Financave, sigurisht që përveç transparencës, bartë me vete edhe një lloj presioni publik për Qeverinë e Shqipërisë.

Të dhënat e ekspertëve dhe insistimi i tyre se kriza globale do ta cenojë ekonominë deri në pikën që qeveria të kërkojë ndihmë nga Banka, tregonte qartë insistimin për lëvrimin e kësaj ndihme, shkruajnë mediet e Tiranës.

Por, me të njëjtën gjuhë, ministri i Financave u ka paraprirë, edhe ai publikisht, kushteve që kërkon Banka Botërore.

Edhe pse negociatat janë ende në fillimin e tyre dhe daljet publike të të dyja palëve nuk kanë treguar qartë synimin final, Bode ka vënë i pari kufirin.

Ministri ka përmendur edhe disa mënyra dhe institucione të tjera që mund të ndihmojnë buxhetin. Si përgjigje për kushtet e kërkuara nga Banka Botërore, Bode ka vënë limitin te interesat e vendit, duke treguar se jo të gjitha kushtet do të pranohen.

Bëhet fjalë për një ndihmë të shtuar nga programi i miratuar i Bankës Botërore për Shqipërinë. Këtë radhë ekspertët kanë përfshirë në listën e kreditimit edhe ndihmë direkte buxhetore.

“Ministria e Financave është në punë, merret me të gjitha: me Bankën Botërore, me Bankën e Zhvillimit, me Bankën e Shqipërisë, me ministritë e tjera dhe gjithçka tjetër, por të jeni të bindur që në të gjitha aktivitetet e përditshme ne udhëhiqemi nga interesi publik, nga interesi i ekonomisë shqiptare. Gjithçka që do të jetë me interes publik për vendin, ne do ta materializojmë, gjithçka që ne do ta konsiderojmë të papërshtatshme ekonomikisht për vendin, sigurisht që nuk do ta pranojmë”, ka thënë Bode.

Pasqyra pesimiste e ekspertëve të Bankës dhe përgjigjja e ministrit, tregojnë qartë se të dyja palët, Qeveria dhe Banka Botërore, po hasin në vështirësi në negociata.