Shqetëson shtimi i lindjeve me prerje cezariane

Nëse në vitin 1998 me prerje cezariane janë bërë 22.7% të lindjeve, në vitin 2008 kjo përqindje ka qenë 33 për qind

Shoqata e mamive të Zvicrës ka filluar një fushatë sensibilizimi kundër lindjeve me prerje cezariane. Duke iu referuar shifrave nga Enti Federal për Statistika, kjo shoqatë ka njoftuar opinionin sot se viteve të fundit është shënuar një rritje e madhe e përqindjes së lindjeve që bëhen në këtë mënyrë, jo të natyrshme.

Nëse në vitin 1998 me prerje cezariane janë bërë 22.7% të lindjeve, në vitin 2008 dhe 2009 kjo përqindje ka qenë 33 respektivisht 32.8 për qind e numrit të gjithëmbarshëm të lindjeve në Zvicër. Rënia e vogël në vitin 2009 krahasuar me një vit më parë ka të bëjë me ngurrimin e spitaleve publike për të bërë lindjet me këtë proces.

Ndërsa në spitalet private janë shënuar edhe më tutje rritje të numrit të lindjeve të tilla, njofton SF1 në një raport të publikuar sot 

Shoqata e mamive synon që të ndryshojë mendimin e gabuar, të përhapur se “lindjet me prerje cezariane janë më të sigurta dhe më të thjeshta”. Për të realizuar këtë synim ajo planifikon botimin e një broshure lidhur me këtë temë.