Shpëtohen katër arinj të murrmë

Katër arinj të murrmë do të merren nga minikopshtet zoologjike në Prizren dhe Prishtinë për t’u dërguar në strehimoren e arinjve afër liqenit të Badovcit

Autoritetet kosovare disa muaj më parë kanë nënshkruar një marrëveshje me Instituti i Kosovës për Mbrojtjen e Natyrës (IKMN), me të cilin parashikohen të mbrohen të gjitha kafshët e egra që gjendën nëpër minikopshtet zoologjike nëpër Kosovën.

Si rezultat i kësaj marrëveshje, të mërkurën do të “riatdhesohen” nga kafazet në kopshtin e hapur, katër arinj të murrmë. Sipas një njoftimi lëshuar nga Ministra e Mjedisit dhe Planifikimit Hapësinor, “shpëtimi” i këtyre arinjve do ndodhë të mërkurën dhe të enjten.

“Nesër më 22 Maj, 2013, do të merren dy arinj nga minikopshti “Shqiponja” në Prizren, ndërkaq, të enjten me 23 Maj, do të merren edhe dy arinj të tjerë nga minikopshti-restoran “Freskia” në Gërmi të Prishtinës”, njofton MMPH.

Ndryshe, disa muaj më parë Ministra e Mjedisit ka nënshkruar marrëveshje me Fondacionin për Mbrojtjen e Kafshëve, për mbajtjen dhe përkujdesjen e arinjve të murrmë në strehimoren në Badovc.

Kjo strehimore është ngritur me ndihmën e Fondacionit për Mbrojtjen e Kafshëve “Vier Pfoten”, me seli në Vjenë, të Austrisë.

Instituti i Kosovës për Mbrojtjen e Natyrës ka ndërtuar strehimoren e parë për arinjtë e murrmë afër liqenit të Badovcit, ndërsa më 17 mars, me sukses ka transportuar arushën e parë me emrin Kasandra.

Me këtë strehimore, IKMN, parashikon t’i mbyllë të gjitha mini-kopshtet zoologjike nëpër Kosovë.

Sipas Ministrisë së Mjedisit, deri më tani janë evidentuar 15 arinj të murrmë që mbahen në këto mini-kopshte, kryesisht në kuadër të restoraneve. Gjatë këtij viti, të gjithë do të transportohen në strehimoren në Badovc.