Shkurtohen procedurat e azilit

Pas referendumit për ashpërsimin e ligjit të azilit, këshilltarja federale Simonetta Sommaruga ka prezantuar një projekt-ligj për ristrukturimin e sistemit të azilit.

60 për qind e të gjitha kërkesave për azil në të ardhmen do të shqyrtohen në nivelin federal brenda një kohe prej më së shumti 140 ditëve. Këtë e ka bërë të ditur ministrja zvicerane e Drejtësisë, Simonetta Sommaruga në një konferencë për media në Bernë. Në të njëjtën kohë të drejtat e azilkërkuesve do të forcohen.

Pas referendumit për ashpërsimin e ligjit të azilit, këshilltarja federale Simonetta Sommaruga ka prezantuar një projekt-ligj për ristrukturimin e sistemit të azilit. Me të është paraparë që 60 për qind e të gjitha procedurave të azilit të shqyrtohen në një maksimum prej 140 ditësh.

Këto procedura do të procedohen në qendrat rajonale dhe federale sidomos në rastet që nuk kërkohet hetim i mëtejshëm.
“Faza e përgatitjes zgjat tri javë,” thotë Simonetta Sommaruga. Këtu përfshihen hetimet paraprake për procedurat e azilit, të tilla si ekzaminimet mjekësore dhe verifikimin e dokumenteve të identitetit.

Në këtë fazë, azilkërkuesit mund të përfaqësohen falas nga një avokat zviceran. Gjithashtu, azilkërkuesit duhet të informohen paraprakisht për ndihmë ofruar të kthimit.

“Pastaj fillon procesi i gjykimit”, tha ministrja e Drejtësisë. Nëse nuk ka nevojë për hetime të mëtejshme, krejt kjo procedurë do të zgjasë deri në dhjetë ditë.

“Brenda 100 ditëve duhet të procedohet një vendim ligjërisht i detyrueshëm”, thotë këshilltarja federale e Zvicrës. Këshilli Federal pret që rreth 20 për qind të rasteve të këtilla të mund të përfundojnë brenda kësaj periudhe.

Në një rast që ka të bëjë me marrëveshjen e Dublinit vlen periudha 140 ditëshe.

Ndërsa për 40 për qind të kërkesave tjera janë të nevojshme hetimet e mëtejshme. Këta azilkërkues do të vazhdojnë të jenë të shpërndarë nëpër kantone. Procedurat e zgjeruara duhet të marrin kohë maksimum prej një viti. “Gjatë kësaj kohe, azilkërkuesit mund të lejohen edhe të punojnë,” thotë Simonetta Sommaruga.

Por, Zvicra ka nevojë për më shumë vende për azilkërkuesit. Duhen edhe rreth 3000 vende shtesë që i ka kërkuar qeveria federale.