Shkarkohet De Biasi

Skuadra e Alavesit ka njoftuar se ka shkarkuar trajnerin italian, Giani De Biasi, ish-përzgjedhës i Kombëtares shqiptare, shkruan albinfo.ch.

De Biasi synonte që këtë skuadër ta mbante në elitë, megjithatë, ka regjistruar gjashtë humbje në tetë ndeshje, dhe kjo ka bërë që drejtuesit e skuadrës spanjolle të mos jenë të kënaqur me të.

Në këto takime, skuadra e drejtuar prej De Biasit ka shënuar vetëm shtatë gola dhe ka pësuar 16 të tillë. Fatale për fatin e trajnerit italianë kanë rezultuar dy humbjet e fundit radhazi me Getafen dhe Eibarin.

Kjo, gjithsesi nuk është eksperienca e parë e De Biasit në kampionatin spanjoll, teksa ka drejtuar më parë edhe Levanten në sezonin 2007-2008. Edhe atëherë gjërat nuk i shkuan më mirë sesa tani: trajneri italian u shkarkua, ndërsa Levante zbriste nga kategoria në fund të sezonit.

De Biasi më vonë ka falënderuar tifozët për përkrahje, dhe lojtarët.