Sërish Jahjaga e “bllokon” Tadiqin

Presidenti i Serbisë, Boris Tadiq edhe njëherë është “bllokuar” nga presidentja e Kosovës, Atifeta Jahjaga për të marrë pjesë në takime ndërkombëtare.

Për shkak të pranisë së presidentet Jahjaga, presidenti serb ka bojkotuar pjesëmarrjen në festimin e 150-vjetorit të bashkimit të Italisë, që do të mbahet më 2 qershor.

Mospjesëmarrjen në këtë manifestim, Tadiqi e ka konfirmuar për agjencinë italiane të lajmeve ANSA, duke pohuar se vendimi i tij nuk do të ndikojë në mbajtjen e samitit italiano-serb në Beograd, në fund të qershorit.

“Jam thellësisht i dëshpëruar pasi që nuk do të jem në gjendje të marr pjesë më 2 qershor në kremtimin e 150 vjetorit të bashkimit të Italisë, pasi që në atë ngjarje është e ftuar edhe presidentja e të ashtuquajturit shtet të Kosovës. Unë duhet dhe dua t’i mbroj interesat legjitime të Serbisë, dhe siç duket, institucionet italiane i kanë dhënë përparësi pjesëmarrjes së përfaqësueses së Kosovës në këtë ngjarje”, ka thënë Tadiq.

Javën e kaluar presidenti serb nuk ishte i pranishëm as gjatë Samitit të 17 presidentëve të vendeve të Evropës Qendrore, që u mbajt në Varshavë të Polonisë për shkak të ftesës dhe pranisë së presidentes së Kosovës.