Serbia, me plan të ri për bisedimet me Kosovën

i delegacionit serb i cilësoi si shumë delikate çështjet e diskutuara me delegacionin e Kosovës

Beogradi zyrtar bën plan të ri për bisedimet me Prishtinën. Shefi i delegacionit negociator të Serbisë, Borko Stefanoviq, ka diskutuar me presidentin Tadiq për hapat e mëtejmë në dialogun me Kosovën të ndërmjetësuar nga BE-ja.

Në takim, po ashtu, të pranishëm ishin edhe ministri i jashtëm, Vuk Jeremiq, dhe ministri për Kosovën, Goran Bogdanoviq. Kryenegociatori serb deklaroi pas takimit se u diskutuan mënyrat e reagimit lidhur me hapat e ardhshëm që mund të marrë secila nga palët e përfshira.

“Nuk dua të nxjerr informacione, por hartuam një skenar deri në detaje për lëvizjet në të ardhmen si dhe për propozimet e ndryshme”, tha Stefanoviq.

Ai shtoi se “gjërat janë shumë urgjente dhe çdo lëvizje e njëanshme në Kosovë mund të vërë në pikëpyetje gjendjen e brishtë të sigurisë”. Shefi i delegacionit serb i cilësoi si shumë delikate çështjet e diskutuara me delegacionin e Kosovës, përfshirë këtu çështjen e kartave të identitetit dhe pasaportave, lirisë së lëvizjes, furnizimin me energji elektrike për serbët në Kosovë si dhe telefoninë mobile.