Serbia arreston dy policë kosovarë

Policët e arrestuar janë Shukri Bunjaku dhe Sami Beqiri

Policia e Serbisë, të shtunën në orën 10.30, ka arrestuar në rajonin e Merdarit dy policë të Kosovës. Këta policë, sipas medieve serbe “kanë hyrë ilegalisht në Serbi. Policët e arrestuar kanë qenë të armatosur me dy pushkë automatike, dy revole dhe aparaturë speciale për matjen e largësisë”, citojnë mediet në fjalë ministrin e brendshëm serb, Ivica Dacic,

“Të arrestuar janë Shukri Bunjaku dhe Sami Beqiri”, ka thënë Dacic. Ai këtë njoftim e ka dhënë në konferencën e organizuar për këtë rast, pas takimit me familjet e pjesëtarëve të MUP-it serbë të arrestuar më 25 shkurt në Kosovë e të liruar sot.

Sipas tij, ata kanë shkelur marrëveshjen ushtarako-teknike të Kumanovës, të vitit 1999. Ai ka thënë se ka ftuar UNMIK-un, KFOR-in dhe EULEX-in që të sqarohen për këtë rast, duke theksuar se secili që e “shkelë marrëveshjen e Kumanovës do të privohet nga liria”.

Lidhur me arrestimin kanë reaguar përfaqësuesit e institucioneve të Kosovës, si presidentja Jahjaga, ministri i brendshëm Bajram Rexhepi etj. Ata e kanë dënuar arrestimin duke e quajtur atë shkelje të ligjit dhe të integritetit territorial të Kosovës.