Rrugë ligjore për t’i mohuar akuzat e Martyt

Thaçi tha se do t’i shfrytëzojë të gjitha kapacitetet legale dhe se pret mbështetje nga vendet e BE-së për t’i zbardhur këto akuza

Kryeministri  kosovar, Hashim Thaçi, ka vendosur t’i ndjekë të gjitha rrugët ligjore për ta mohuar atë çfarë ka thënë raportuesi i Këshillit të Evropës, Dick Marty. Thaçi, në një konferencë të jashtëzakonshme për media, tha se raporti i Martyt është një përpjekje e dështuar e tij për ta njollosur Ushtrinë Çlirimtare të Kosovës dhe për ta dëmtuar imazhin e Kosovës në aspektin ndërkombëtar.

Ai tha së është prekur personalisht, por edhe si kryeministër i Kosovës për këto pretendime, por sipas tij, me rëndësi është që e vërteta dhe e drejta është në anën e kosovarëve. “Dihet se kush ka bërë krime gjatë luftës në Kosovë dhe për këto krime shumë udhëheqës të shtetit serb janë dënuar nga gjykata ndërkombëtare për krime lufte”, tha Thaçi.

Kryeministri i Kosovës tha se do t’i shfrytëzojë të gjitha kapacitetet legale dhe se pret mbështetje nga të gjitha vendet e Bashkimit Evropian për t’i zbardhur këto akuza të pabaza. Kryeministri Thaçi u bëri thirrje qytetarëve të Kosovës t’i marrin me qetësi këto raporte, duke thënë se Kosova është shembulli më i mirë i bashkëpunimit me drejtësinë ndërkombëtare.