Rritet bashkëpunim për tregti ndërmjet Kosovës dhe Shqipërisë

Aleanca Kosovare e Bizneseve dhe Këshilli i Agrobiznesit Shqiptar kanë nënshkruar memorandum mirëkuptimi për bashkëpunim tregtar, me qëllim të rritjes së shkëmbimeve tregtare ndërmjet Kosovës dhe Shqipërisë si dhe plotësimin e tregut të vendit me produkte shqiptare.

Kryetari i AKB-së, Agim Shahini, është zotuar para biznesmenëve se të dyja organizatat, AKB dhe KASH, nga tash e tutje do të kenë një bashkëpunim bilateral për shkëmbim tregtar.

Ai njëherësh falënderoi shtetin shqiptar për plotësimin e tregut të Kosovës me produkte shqiptare.

Nga ana tjetër, kryetari i Këshillit të Agrobiznesit, Enver Ferizaj duke përshëndetur vendimin e Qeverisë së Kosovës për masat reciproke ndaj Serbisë, ka premtuar se nuk do të ketë pengesa në lidhje me shkëmbimin tregtar ndërmjet Kosovës dhe Shqipërisë.

Në mënyrë që të lehtësohet qarkullimi tregtar, që nga 2007-ta shteti shqiptar ka hequr të gjitha obligimet doganore për bizneset nga Kosova të cilat janë të interesuara të eksportojnë produktet e tyre në Shqipëri.