Qeveria zvicerane ndanë 63 mijë euro për barazi gjinore

Përfituese të këtij fondi janë komunat Viti, Kamenicë, Kllokot, Novobërdë, Ranillug, Partesh, Shtërpce , Han Elezit dhe Kaçanik

Këto komuna të Kosovës do të ndihmohen në zhvillimin e politikave  që kanë të bëjnë me çështjet gjinore.

Qeveria zvicerane përmes agjencisë së saj për zhvillim dhe bashkëpunim SDC, ka ndarë një shumë prej 63 mijë euro për të mbështetur zyrat për barazi gjinore si dhe OJQ-të lokale që merren me çështje të gruas në nëntë komuna të Kosovës Juglindore.

Merita Barileve, zyrtare në projektin Zvicër –Kosovë, për qeverisje lokale dhe decentralizim, LOGOS, ka thënë se përmes këtij fondi për zyrat komunale të barazisë gjinore dhe OJQ-të lokale në komunat Viti, Kamenicë, Kllokot, Novobërdë, Ranillug, Partesh, Shtëprce , Han Elezit dhe Kaçanik, do të ndihmohen në zhvillimin e aktiviteteve që kanë të bëjnë me avancimin e politikave komunale për çështje gjinore..

“Projekti LOGOS, përveç mbështetjes që është duke i dhënë komunave partnere të Kosovës Jug-lindore, në projekte investive, planifikim të buxhetit, planifikim strategjik, menaxhim të mbeturinave, të hyrave vetanake dhe në fusha tjera , një vëmendje të veçantë i ka kushtuar edhe barazisë gjinore dhe për këtë qëllim janë ndarë 63 mijë euro , ku secila komunë ka përfituar nga një projekt në vlerë prej 7 mijë euro”, ka thënë Barileva.

Ajo ka theksuar se bartëse të këtyre projekteve do të jenë zyrtaret për barazi gjinore në komunat përkatëse, ndërsa në disa komuna këto fonde u janë ndarë edhe OJQ-ve, siç është rasti me komunën e Kamenicës, Novobërdës dhe Ranillugut.

” Përveç ndihmës që ky fond u jep komunave partnere në komponentin e barazisë gjinore qëllim tjetër është që zyrtaret për barazi gjinore të rrisin kapacitetin e tyre në fushë të hartimit, dhe zbatimit të ciklit të projektit”, ka thënë Barileva.

Ndërsa Ibadete Hyseni, zyrtare për barazi gjinore në Viti, ka thënë se përmes fondit nga projekti LOGOS, zyra për barazi gjinore në Viti do të implementoi projektin që ka të bëjë me promovimin e ligjit për barazi gjinore dhe inicimin e procesit të implementimit të perspektivës gjinore përmes politikave buxhetore të komunës.

“Përmes kësaj mbështetje si zyre e barazisë gjinore do të angazhohemi që të gjenden rrugët dhe mekanizmat institucional, për përfshirjen e çështjeve gjinore në politikat publike komunale si dhe në zbutjen e dallimeve gjinore”, ka thënë Hyseni.