Qeveria nuk tregon për të ardhurat e Ademajve

Kërkesa për transparencë është legjitime, por interesi publik kufizohet nga të drejtat personale të njerëzve të veçantë

Qeveria e kantonit Thurgau refuzon të ofrojë të dhëna lidhur me të ardhurat e familjes së Murtez Ademajt nga Bürgleni, i bërë i njohur me aksionin e tij protestues me thasë bërlloku, të verës së kaluar.

Gazeta “Thurgauer Zeitung” e bën këtë konstatim duke iu referuar pyetjes së mbetur pa përgjigje konkrete, që një deputet kantonal nga SVP i ka bërë qeverisë së kantonit lidhur me çështjen. Deputeti Urs Martin, ka dëshiruar të dijë se sa të holla merr familja Ademaj nga shteti dhe nëse janë plotësuar kushtet për dëbimin e tij nga Zvicra.

“A qëndron fakti se kjo familje në emër të ndihmave (pensioni i invaliditetit, shtesat e fëmijëve, plotësimet) merr 6300 franga në muaj? A plotësohet baza ligjore për të dëbuar këtë familje nga Zvicra?”. Kjo ka qenë pyetja konkrete e shtruar nga ai.

Por përfaqësuesi i qeverisë së kantonit, në paraqitjen e bërë te premten (sot) nuk ka dhënë informata konkrete. Për shkak të detyrimit për mbrojtjen e të dhënave, kjo pyetje nuk mund të marrë përgjigje, ka thënë ai. “Me gjithë faktin se, nevoja e shprehur për transparencë është legjitime, interesi publik kufizohet nga të drejtat personale të njerëzve të veçantë”.

Në fillim të marsit, policia kishte dëbuar nga shtëpia me qira familjen Ademaj për shkak të refuzimit të Ademajt për pagesën e qirasë. ndërsa vitin e kaluar, në shenjë proteste kundër autoriteteve të komunës ai e kishte shndërruar oborrin e shtëpisë ku banonte në një deponi bërlloku.

Për shkaqe sigurie, gjatë aksionit të dëbimit nga banesa, Murteza Ademaj qe arrestuar nga policia. Sipas deputetit Martin ai pastaj ishte përcjellë në një klinikë psikiatrike, shkruan “Thurgauer Zeitung”.