Qeveria, një minutë heshtje për heroin Enver Zymberi

"Enver Zymberi ka rënë në mbrojtje të Kushtetutës, integritetit dhe tërësisë territoriale të vendit", ka deklaruar kryeministri Thaçi

Me një minutë heshtjeje për policin Enver Zymberi që humbi jetën dje pas plagëve të marra gjatë aksionit në veri, Qeveria e Kosovës ka nisur mbledhjen e rregullt, përderisa ka shprehur ngushëllime familjes së policit të rënë në krye të detyrës.

Enver Zymberi, me propozimin e Qeverisë së Kosovës, nga presidentja Atifete Jahjaga është nderuar me titullin “Hero i Kosovës”.

“Ia kemi borxh Enverit, e mbi të gjitha fëmijëve të tij dhe gjithë Kosovës që sovranitetin e Kosovës, kufijtë e saj t’i ruajmë dhe t’i mbrojmë përgjithmonë. Andaj heroi Enver Zymberi ka rënë në mbrojtje të Kushtetutës, ligjeve, integritetit dhe tërësisë territoriale të vendit”, ka deklaruar kryeministri Hashim Thaçi.

Ai ka bërë të ditur se në një të ardhme të afërt, Qeveria e Kosovës do të rregullojë me ligj që gjithë familjet e policëve të rënë në detyrë të kenë një pension dhe kjo çështje të rregullohet njëherë e përgjithmonë.

Kabineti qeveritar ka marrë vendim për ndarjen e 25 mijë eurove për familjen e heroit më të ri të Kosovës, Enver Zymberi