Qeveria kosovare ndodhet para sfidave ekonomike

Kosova po përballet me shumë sfida në zhvillimin e saj ekonomik

Ndër to janë zvogëlimi i ekonomisë joformale, e cila është e shumë e pranishme, mosvendosja e rendit dhe ligjit në tërë territorin e Kosovës, moszbatimi i marrëveshjes për tregti të lirë nga Serbia edhe zhvillimin energjetik në Kosovë. Ministria e Zhvillimit Ekonomik në bashkëpunim me Odën Ekonomike të Kosovës dhe Odën Amerikane në Kosovë, kanë organizuar konferencën me temën “Mundësitë dhe sfidat e zhvillimit ekonomik dhe fuqizimi i sektorit privat”, në të cilën u diskutuan për reformat ekonomike dhe fuqizimin e sektorit privat, si një ndër sektorët më të rëndësishëm të zhvillimit ekonomik. Sipas Ministrit të Zhvillimit Ekonomik, Besim Beqaj, ekonomia e Kosovës nuk është aq keq krahasuar me vendet e rajonit.

Por, sipas tij problemet ekonomike globale kanë pasur efektin e tyre edhe në ekonominë kosovare, duke e pakësuar zhvillimin e hovshëm të saj dhe duke e vënë Qeverinë para sfidave të mëdha ekonomike.

Pjesmarrësit kanë thënë se për zhvillimin ekonomik, është shumë me rëndësi edhe infrastruktura rrugore, si një mundësi e mirë për qarkullim të mallrave dhe njerëzve.

Ministri i Infrastrukturës, Fehmi Mujota ka bërë të ditur projektet e Ministrisë së Infrastrukturës, siç është ai i autostradës Morinë-Mërdarë.

Një ndër sektorët kryesor për zhvillim të qëndrueshëm ekonomik në vend u përmend edhe bujqësia, të cilës, sipas Ministrit të Bujqësisë, Pylltarisë dhe Zhvillimi Rural, Blerand Stavileci, kohëve të fundit po i kushtohet rëndësi e veçantë, duke e stimuluar atë me kredi dhe subvencione të ndryshme.