Propozohet ashpërsim i rregullave për bashkim familjar

Familjarëve të refugjatëve me status të njohur, me rastin e bashkimit familjar nuk do tu jepet statusi që ka familjari i tyre në Zvicër.

Komisioni për Politikë Shtetërore i Parlamentit Nacional ka propozuar rregulla më të ashpra për bashkimin familjar të të huajve me qëndrim në Zvicër. Këtë propozim komisioni në fjalë e ka marrë duke iu përgjigjur tri iniciativave të deputetit të FDP-së, Philip Müller.

Sipas komisionit, në të ardhmen, familjarëve të refugjatëve me status të njohur, me rastin e bashkimit familjar nuk do tu jepet statusi që ka familjari i tyre në Zvicër.

Një risi tjetër që synon ta sjellë komisioni në fjalë është ai që të huajt me status të njohur të refugjatit duhet të presin dhjetë vite për të fituar qëndrimin e përhershëm në Zvicër (Vizën C). Pa këtë ndryshim, afati për vizën C te kjo kategori të huajsh është pesë vite, shkruan nzz.ch

Gjithashtu me propozimin e Komisionit për Politikë Shtetërore, bashkimi familjar do të vështirësohet edhe për personat me leje të përhershme qëndrimi.

Pro ashpërsimit të kushteve për të huajt kanë votuar 12 deputetë, anëtarë të komisionit, kundër tyre 11 ndërsa dy deputetë janë përmbajtur.