Policia përleshet me besimtarët myslimanë

Eskalon protesta e besimtarëve islam në kërkesën e tyre për ndarjen e hapësirës për ndërtimin e xhamisë

Policia, që herën e kaluar u përkujdes që falja e xhumasë të shkonte pa u penguar, kësaj radhe, ka provuar që t’i largoj nga rruga ata.

 Veprimet e policisë kanë ngjallur reagimin e pjesëmarrësve. Pas përplasjeve, dy persona janë arrestuar, ka konfirmuar Lëvizja “Bashkimi”, ndërsa është tentuar që të arrestohet edhe pjesëtari i kësaj lëvizjeje, Fuad Ramiqi, por ka arritur tu shmanget pjesëtarëve të policisë. 

Pjesëtarë të shumtë të policisë, përfshirë edhe njësitet speciale ishin aty, ndryshe nga hera e kaluar kur falja e xhumasë, kaloi qetë. 

Para eskalimit të situatës, Fuad Ramiqi, ka përsëritur kërkesat drejtuar institucioneve dhe komunës së Prishtinës, për ndarjen e hapësirës, ndërsa u ka bërë thirrje pjesëmarrësve që të jenë qetë. 

Kjo është java e dytë, që Lëvizja Bashkimi, me organizata të tjera, falin xhumanë në rrugë në shenjë proteste, para Xhamisë së Çarshisë, duke kërkuar ndarjen e hapësirës në qendër të Prishtinës, për ndërtimin e xhamisë.