Përmbyllet debati me qytetarë për ndryshimet në Kushtetutë

Presidenti i ardhshëm nuk pritet të përfundojë lehtë në Gjykatën Kushtetuese, ashtu siç e kanë pasur fatin dy pararendësit e tij, Fatmir Sejdiu e Behgjet Pacolli.

Vetëm iniciativa për shkarkim të kreut të shtetit, parashihet të ndërmerret me 40 nënshkrime të deputetëve.

E për t’u deponuar një kërkesë e kësaj natyre në Gjykatën Kushtetuese, e cila është e autorizuar ta japë verdiktin final për shkarkim, duhet paraprakisht të merret pëlqimi i 80 ligjvënësve, shkruan Koha Ditore.

Kjo procedurë e shkarkimit të presidentit që është e ngjashme me modelin kroat, është propozuar nga Komisioni parlamentar për ndryshimin e Kushtetutës, i cili e ka mbyllur në Prishtinë ciklin e debateve me qytetarë nëpër komunat e ndryshme të vendit.

Kryetari i këtij komisioni, Arsim Bajrami, ka paralajmëruar se ditëve në vijim do të hapet debati edhe me partitë politike dhe me grupet parlamentare, me synim të arritjes së një konsenuesi politik, para se ndryshimet kushtetuese të hidhen në votim në Kuvend.

Ai e ka pranuar se çështja që më së shumti është ngritur gjatë debateve me qytetarë ka qenë ajo e dyshtetësisë së kandidatëve për president.