Për tre muaji janë riatdhesuar 682 persona

Gjatë një viti kthehen afro 5000 persona, kanë bërë të ditur zyrtarë të Ministrisë së Punëve të Brendshme

Është takuar Bordi Ekzekutiv për Ri-integrimin e Personave të Riatdhesuar ku u shqyrtuan 23 kërkesa të personave të riatdhesuar që kanë të bëjnë me ofrimin e ndihmës gjatë ri-integrimit të tyre, nga të cilat u aprovuan 21 kërkesa, konfrom kritereve të përfitimit nga Programi për Ri-integrim.

Në këtë takim të Bordit Ekzekutiv për Ri-integrimin e Personave të Riatdhesuar është vendosur që të nënshkruhen marrëveshje mirëkuptimi në mes të Ministrisë së Punëve të Brendshme dhe komunave, që kanë të bëjnë me renovimin dhe ndërtimin e shtëpive të personave të riatdhesuar, konform kritereve për përfitim nga Programi.

Kurse, gjatë tre muajve të fundit në Kosovë janë kthyer 682 persona, kurse gjatë një viti kthehen afro 5000 persona, kanë bërë të ditur zyrtarë të Ministrisë së Punëve të Brendshme.

Sipas tyre sivjet, Kosova ka nënshkruar marrëveshje riatdhesimi me Slloveninë, Belgjikën, Holandën, Luksemburgun, Malin e Zi, si dhe Çekinë.

Ministria e Punëve të Brendshme është në proces të hartimit edhe të katër draft marrëveshjeve për riatdhesim me Kroacinë, Hungarinë, Finlandën, Letoninë dhe Suedinë.

Raportohet nga mediat kosovare se nisma për marrëveshje të këtilla janë dërguar përmes Ministrisë së Punëve të Jashtme edhe në disa shtete tjera.