Për investime të huaja duhet kushte më të mira në Kosovë

Kosova konsiderohet vend i sigurt për investime, por investitorët e huaj kërkojnë që investimet e tyre të jenë të mbrojtura me ligj

Korporatat e fuqishme botërore kërkojnë në Kosova që investimet e tyre të jenë të mbrojtura me ligj dhe ato ligje të jenë të aprovuara dhe në fuqi.

Ekspertë të ekonomisë vlerësojnë se për tërheqjen e investime të huaja duhet të nxirren ligje që sigurojnë një ambient të sigurt për investitorët e huaja.

Sipas tyre kjo duhet të jetë prioritet pasi që në Kosovë viteve të fundit ka rënie të investimeve të huaja, në një periudhë kur shtimi i tyre vlerësohet thelbësor për rimëkëmbjen ekonomike të vendit.  

Myzejene Selmani, ka thënë se institucionet përgjegjëse duhet të krijojnë kushte më të favorshme për investime të huaja.

Ajo konsideron se me rritjen e investimeve direkte do të rritej edhe zhvillimi ekonomik dhe do të binte shkalla e lartë e papunësisë në vendin tonë.

Sipas saj Ministria e Tregtisë, por edhe ajo e Zhvillimit Ekonomik duhet të marrin modelet nga rajonit dhe të ofrojnë një ligj që do t’iu garantojë investitorëve lehtësira për investime në Kosovë, dhe se në këtë drejtim nuk duhet humbur shumë kohë.

Kryetari i Aleancës Kosovare të Bizneseve, Agim Shahini, edhe pse konsideron se Kosova është vend i sigurt për investime, sipas tij prapë se prapë, korporatat e fuqishme botërore kërkojnë që investimet e tyre të jenë të mbrojtura me ligj dhe ato ligje të jenë të aprovuara dhe në fuqi.

Kuvendi i Kosovës ende nuk e ka nxjerrë ligjin për nxitjen e investimeve, që mund të ndikojë direkt në rritjen e prodhimit dhe eksportit.

Sipas raporteve të fundit të Bankës Qendrore të Kosovës shihet se investimet e huaja direkte në vendin tonë gjatë tremujorit të parë të këtij viti kanë rënë për më shumë se 19,5 për qind, krahasuar me periudhën e njëjtë të vitit të kaluar.

Investimet e huaja gjatë kësaj periudhe të vitit kaluar kanë qenë 59 milionë euro.