Pedofilëve tu ndalohet rreptësisht puna me fëmijë

Dëshirohet që personat e dënuar për keqtrajtim seksual të fëmijëve, të mos kenë fare të drejtë pune me të mitur

Një iniciativë e re popullore që pritet të procedohet për votim kërkon ndalim absolut të të drejtës së punës me fëmijë për personat e dëshmuar si pedofilë.

Iniciativa, që është vepër e shoqatës “Marche Blanche” ka dorëzuar dje në Zyrën Federale 112 mijë nënshkrimet e grumbulluara. 100 mijë nënshkrime janë të nevojshme për tu miratuar për votim një iniciativë në nivelin federal.

Shoqata e përmendur kishte iniciuar edhe iniciativën për mosvjetrimin e veprave penale të abuzimit me fëmijë, shkruan drs.ch.

Më saktësisht, përmes kësaj iniciative synohet të bëhet e mundur që personat e dënuar për keqtrajtim seksual të fëmijëve, të mos kenë fare të drejtë, as në mënyrë zyrtare dhe as vullnetare që të kryejnë ndonjë pune që lidhet me të miturit.

Edhe në kushtet e sotme, abuzuesit seksualë me fëmijët, e kanë të ndaluar ushtrimin e profesionit, por vetëm në rast se delikti ka ndodhur gjatë ushtrimit të profesionit.