PE me rezolutë për njohjen e Kosovës

Komiteti për politikë të jashtme, ka miratuar propozim e eurodeputetes Ulrike Lunacek që PE të miratojë një rezolutë për njohjen e Kosovës nga pesëshja e BE-së

Parlamenti Evropian do të kërkojë edhe një herë nga pesëshja e Bashkimit Evropian (Spanja, Sllovakia, Rumania, Greqia dhe Qipro) që nuk e ka njohur Kosovën, që ta njohin pavarësinë e saj, ndërsa i rekomandohet BE-së që ta përshpejtojë procesin e liberalizimit të vizave me Kosovën.

Kështu thuhet në një propozim-rezolutë për Kosovën e cila u votua në komitetin për politikë të jashtme të Parlamentit Evropian. Autorja e këtij dokumenti është raportuesja për Kosovën, austriakja Ulrike Lunacek e cila mori përkrahjen e 35 anëtarëve të komitetit, ndërsa kundër këtij drafti votuan 7 deputetët e 4 tjerë abstenuan.

Ulrike Lunacek shpreson se kjo shumicë dërmuese do dominojë edhe gjatë votimit në seancë plenare në muajin mars.

Në tekstin e draft-rezolutës, të cilën e publikoi RTK, kërkohet nga Komisioni Evropian që të procedojë më tutje me procesin e liberalizmit të vizave për Kosovën, pavarësisht fluksit të fundit të imigrantëve që ilegalisht po ia mësyjnë Evropës.

“Jam e sigurt se ndër arsyet që shumë njerëz u larguan nga Kosova, është edhe ndjenja se është i vetmi në rajon që nuk mundet me lëvizë”, ka deklaruar Lunacek pas votimit të sotëm.

Sido që të jetë, shqetësimi për numrin e madh të qytetarëve të Kosovës që braktisin vendin, ka zënë vend të rëndësishëm në raportin e Ulrike Lunacek. Në mes tjerash në dokument përfshihet edhe kërkesa për hetime serioze në lidhje me aludimet për korrupsion brenda mision EULEX.

Dokumenti i Parlamentit Evropian shprehë pakënaqësinë me numrin aq të vogël të femrave në qeverinë e Kosovës. Pas tejkalimit të ngërçit politik, Parlamenti Evropian kërkon nëpërmjet këtij dokumenti, që qeveria të ndërmarr reformat e domosdoshme dhe të vazhdojë rrugëtimin evropian.

Kërkohen nga qeveria në Prishtinë, që në listë të prioriteteve të ketë përpjekjet në ndërtimin e sundimit të ligjit dhe pavarësinë e gjyqësorit dhe luftimit efikas të krimit dhe korrupsionit. Në draft ka shprehje shqetësimi për shkak të rritjes së radikalizimit në Kosovë dhe shkrues së të rinjve në luftërat në Siri dhe Irak.

Ndërkohë, mirëpritet pjesëmarrja e Kosovës në luftën kundër terrorizmit.

Ndryshe draft-rezoluta shkon në seancë të PE-së gjatë muajit mars, me ç’rast, dokumenti shndërrohet në Rezolutë të Parlamentit Evropian.