PDK dhe LDK vazhdojnë garën për kreun e Ferizajt

Kandidatët e PDK-së dhe LDK-së në balotazh: Agim Aliu i PDK-së, ka fituar mbi 40 për qind të votave, Adem Salihaj i LDK-së 24 për qind

Komisioni Qendror i Zgjedhjeve të Kosovës, në rezultatet preliminare e ka shpall fitues kandidatin e PDK-së, Agim Musliu me rreth 40 për qind të votave për dallim nga kandidati i dytë, ai i LDK-së, Adem Salihaj që ka fituar rreth 24 për qind.

I treti është renditur Faton Topalli i Lëvizjes “Vetëvendosje” me 16 për qind.

I katërti është Naim Ferati i AAK-së me 11 për qind. Përqindjen tjetër të votave e kanë ndarë katër kandidatët e tjerë, prej të cilëve ai i AKR-së ka marrë rreth 4 për qind ndërsa të tjerët edhe më pak.

Edhe organizata joqeveritare INPO dhe D4D shpallën paraprakisht rezultatet e zgjedhjeve të jashtëzakonshme për kryetar të Ferizajt, sipas të cilave kandidati i Partisë Demokratike të Kosovës dhe ai i Lidhjes Demokratike të Kosovës shkojnë në balotazh.

Duke u bazuar në vëzhguesit në terren INPO dhe D4D raportuan rezultatin si vijon:

Kandidati i PDK-së, Agim Aliu, ka fituar mbi 40 për qind të votave, Adem Salihaj i LDK-së 24 për qind, kurse kandidatët tjerë, sipaskëtyre rezultateve dalin nga gara e mëtutjeshme e balotazhit.

Kështu,sipas këtyre rezultateve, jo finale, Faton Topalli nga Lëvizja Vetëvendosje ka fituar 16 për qind, Naim Ferati nga Aleanca për Ardhmërinë e Kosovës me 10 për qind dhe Ramadan Hasani nga Aleanca Kosova e Re 4 për qind.

Në garën e 29 prillit kanë marrë pjesë edhe Bujar Ademi nga Partia e Drejtësisë, Ramadan Emini nga Lëvizja e Bashkuar si dhe kandidati i pavarur Rrahim Sadiku.

Sipas procedurave dhe ligjit, balotazhi zhvillohet ndërmjet dy kandidatëve me më shumë vota, nëse njëri prej tyre nuk e ka kaluar pragun prej 50 plus 1 për qind të votave.

20:20 – Mbyllen vendvotimet në Ferizaj

30.55% e qytetarëve iu kanë përgjigjur thirrjes për të dalë në zgjedhjet e jashtëzakonshme për Kryetar të Ferizajt

Komisioni Qendror i Zgjedhjeve dhe Demokracia në Veprim kanëë bërë të ditur se në Ferizaj janë mbyllur qendrat e votimit për zgjedhjet e jashtëzakonshme për kryetar të komunës.

Kryetarja e Komisionit Qendror të Zgjedhjeve, Valdete Daka ka deklaruar 　për RTK-në se 30.55% e qytetarëve iu kanë përgjigjur thirrjes për të dalë në zgjedhjet e jashtëzakonshme për Kryetar të Ferizajt.

Zgjedhjet në të cilat kanë garuar 8 kandidatë, thuhet se janë zhvilluar në mënyrë të qetë, ndonëse me disa parregullsi që, sipas zyrtarëve　 nuk e kanë dëmtuar procesin.

Për vëzhgimin e këtyre zgjedhjeve janë certifikuar 1.514 vëzhgues, prej të cilëve vetëm 6　ndërkombëtarë, kurse të tjerët u përkasin partive politike dhe organizatave joqeveritare.

Zgjedhjet e jashtëzakonshme për kryetarin e Ferizajt pasuan dorëheqjen e kryetarit të deritashëm, Bajrush Xhemajli.

  

  

---