Pas 12 vitesh mbetet ankthi për të pagjeturit

Në Kosovë sot shënohet Dita Kombëtare e të Pagjeturve. Kjo ditë shënohet me një varg aktivitetesh të përqendruara në Prishtinë. Shënimi i kësaj dite bëhet për faktin se në këtë datë, në vitin 1999, në fshatin Mejë të komunës së Gjakovës, forcat serbe kanë vrarë dhe zhdukur 377 civilë shqiptarë të moshës prej 15 deri 75 vjeç.

Drejtuesi i Këshillit të Asociacioneve të Familjarëve të Personave të Pagjetur, Haki Kasumi, ka thënë se ende mungon serioziteti i institucioneve për t’iu qasur drejt problemit.

“Edhe 12 vjet pas përfundimit të luftës, nga numri i përgjithshëm që ishte mbi pesë mijë të zhdukur, kanë mbetur edhe 1 800 njerëz, për të cilët mungon çdo informacion. Institucionet tona, në njëfarë mënyre, nuk janë serioze në qasjen e këtij problemi”, ka thënë Kasumi.

Ndërsa Prenk Gjetaj, drejtues i Komisionit Qeveritar për Personat e Pagjetur, ka thënë se angazhimi i institucioneve qeveritare për çështjen e zbardhjes së fatit të këtyre personave është i vazhdueshëm.

Zyrtarë ndërkombëtarë në Kosovë kanë thënë se janë ende rreth 1800 persona të pagjetur nga lufta e Kosovës. Zëvendësshefi i EULEX-it, Andy Sparkes ka thënë se kjo është arsyeja pse misioni evropian i sundimit të ligjit në Kosovë i ndihmon Departamentin e Mjekësisë Ligjore (DML) të Ministrisë së Drejtësisë të Kosovës në përpjekjet e tyre intensive për përcaktimin e fatit të të pagjeturve.

Ndërkohë presidentja Atifete Jahjaga, me rastin e Ditës së të Pagjeturve, ka deklaruar se pasojat e luftës në Kosovë kanë qenë të rënda dhe se ajo ndan dhimbjen me të gjitha familjet e personave të pagjetur. Presidentja ka thënë se shteti i Kosovës ka bërë, është duke bërë dhe duhet të bëjë çdo gjë që është e mundur për të lehtësuar dhimbjen e familjarëve të familjeve të dëshmorëve dhe të të pagjeturve si dhe të rikuperojë dëmin.

Dje, Fondi për të Drejta Humanitare, si pjesë e koalicionit të organizatave joqeveritare për Komisionin Rajonal (KOMRA), ka nisur grumbullimin e nënshkrimeve në Kosovë, për themelimin e këtij komisioni, që do të merret me numrin e të vrarëve dhe të zhdukurve gjatë luftërave në territoret e ish-Jugosllavisë.