Pacolli në vend të njohjes, siguron bërjen e biznesit në Nigeri

Zëvendëskryeministri, Behgjet Pacolli, në Nigeri, ka arritur marrëveshje me autoritet e këtij shteti, e cila mundëson që kompanitë e ndryshme nga Kosova të ushtrojnë biznesin e tyre në këtë shtet afrikan.

Gjithashtu, Pacolli ka marrë premtime nga udhëheqësit e këtij vendi për të vendosur marrëdhënie ekonomike ndërshtetërore, përkatësisht për hapjen e zyrave ndërlidhëse në Kosovë dhe në Nigeria për bashkëpunim ekonomik.

“Ai në bashkëpunim me dy konsorciume evropiane firmosi një marrëveshje të rëndësishme investimesh në Nigeri. Prej kësaj marrëveshjeje të firmosur investimi prej 1.6 miliardë dollarësh në fushën e energjetikës, të rafinimit të naftës, e të tjera do të përfitojnë kompanitë kosovare si nënkontraktore të këtyre kompanive evropiane”, thuhet njoftimin e lëshuar nga Kabineti i Pacollit.

Sipas njoftimit, Pacolli gjithashtu ka nënshkruar një memorandum bashkëpunimi me disa konsorciume, të cilat do të përfitojnë nga Kosova mallra, shërbime dhe fuqi punëtore të të gjitha kategorive në vlerë prej mbi 500 milionë dollarësh.

Pacolli ka informuar për këtë sukses kryeministrin, kryetarin e Odës ekonomike të Kosovës, Safet Gërxhaliu, ministren e Tregtisë dhe Industrisë, Mimoza Kusari Lila, etj.