Nuk shkurtohen procedurat për azilkërkuesit e Ballkanit

Kërkesat për azil nga Ballkani nuk do të refuzohen automatikisht në të ardhmen

Klasifikimi i shteteve të Ballkanit si vende “të sigurta” nuk do të shpejtojë procedurat për dëbimin më të shpejtë të azilkërkuesve nga Gjermania, shkruan gazeta gjermane “Tageszeitung”.

Azilkërkuesit nga Serbia, Bosnja dhe Maqedonia vazhdojnë të zhvillojnë procedurat e pandryshuara të azilit në Zyrën Federale për Migracionin dhe Refugjatët (BAMF). Kjo do të thotë se azilantët intervisohen si deri më tani.

Azil marrin vetën ata që kërcënohen personalisht nga persekutimi, tortura, dhuna joshtetërore apo kërcënime të ngjashme.

Sipas ligjit, mund të merren në konsideratë edhe diskriminimet e shumëfishta, të cilat në efekt të fundit janë të barasvlershme me persekutimin.

Problemi i aplikuesve nga Ballkani Perëndimor është se ata nuk mund të sjellin apo të dëshmojnë fakte relevante.

Deri tani gati të gjitha kërkesat për azil nga Ballkani Perëndimor janë refuzuar, shkruan “Tageszeitung”.

Se sa zgjasin procedurat e azilit është vetëm çështje e organizimit dhe jo ligjore. Prej disa kohësh kërkesat për azil të aplikantëve serbë, boshnjakë dhe maqedonas kanë prioritet në BAMF.

Prandaj këto procedura azili zgjasin vetëm tre deri katër muaj, ndërsa aplikantët nga vendet e tjera duhet të presin mesatarisht tetë muaj për vendimin për të ardhmen e tyre në Gjermani.