Nuk respektohet vendimi për heqjen e lejes së punës

Mbetet e paqartë ku shkojnë paratë që merren në emër të lëshimit të lejeve të punës

Bizneset dhe Ministria e Tregtisë dhe Industrisë kanë raportuar se disa komuna nuk po respektojnë ende vendimin për heqjen e lejes së punës, përkatësisht ligjin për tregtinë e brendshme.  

Përkundër ligjit në fuqi që nuk përfshin lejen e punës në disa komuna ata janë detyruar të paguajnë për to. Këtë e konfirmon edhe këshilltari i Ministres së Tregtisë, Bernard Nikaj.“Ka pasur disa raste kur njerëzit janë ankuar tek ne për çështjen e lejeve të punës. Këtë e kemi kuptuar edhe përmes partnerëve në projekte . Ministrja ka pasur takim me shumicën e komunave dhe i ka njoftuar zyrtarët e komunave. Ne prapë është dashur të ndërhyjmë për të hequr këto pengesa”, ka thënë Nikaj për radio Kosovën.

Mbetet e paqartë ku shkojnë paratë që merren në emër të lëshimit të lejeve të punës. 

Komunat kishin kundërshtuar me forcë ligjin për tregti të brendshme me shpjegimin se ky ligj i përjashton ato tërësisht dhe krijon paqartësi.  

Raporti i fundit i Bankës Botërore ka kritikuar pikërisht lejet e punës, si një nga elementet më negativë që radhitnin Kosovën ndër vendet ku më së shumti ka vështirësi në hapjen dhe të bërit biznes.