Në Parlamentin Evropian, me fëmijë për dore

Parimi i barazisë së femrave nuk aplikohet nga vetë Parlamenti Evropian në Strasburg

Deputetja italiane, Licia Ronzulli, pati bërë senzacion në shtator të vitit 2010, duke arritur me vajzën e saj, Vittoria, 18-muajshe, në Parlamentin Evropian, njofton e përditshmja “Lesquotidiennes.ch”.

Duke iu referuar të përditshmes “Libération”, që nga ky eveniment shumë kolege të saj e kanë përsëritur të njëjtën gjë, duke i marrë me vete fëmijët në Strasburg. Ky gjest bëhet me qëllim që të rikujtohet vështirësia për gratë për të bërë karrierë dhe njëkohësisht të merren me familje.

“Femrat inkurajohen të studiojnë dhe të kenë një punë interesante. Pastaj, më në fund, ato duhet të zgjedhin mes karrierës së tyre dhe jetës private. Situata do të duhej të ishte e tillë, ku femrat nuk do të duhej të zgjedhin mes këtyre dy situatave”, ka thënë Rita Ronzulli, 36- vjeçare dhe anëtare e Partisë Popullore evropiane.

Përpos këtij dimensioni politik, anëtarët e tjerë të Parlamentit ankohen po ashtu edhe për aspekte praktike. Në fakt, gratë nuk gëzojnë pushime të lindjes dhe burrat nuk kanë të drejtë pushimi në rast lindjeje të bashkëshortes së tyre.

Gratë që sapo kanë lindur konsiderohen “në mungesë” nëse nuk marrin pjesë në votim dhe, kështu që nuk u preken mëditjet e tyre.

“Është një paradoks që ligjet që ne i adoptojmë këtu nuk aplikohen ndaj deputetëve”, nënvizon deputetja britanike, Catherine Stihler.