Ndërroi jetë polici Enver Zymberi, i plagosur në veri

Ai nuk ka mundur t'iu përballojë plagëve të rënda në kokë, që kishte marrë nga snajperët serbë, sot në veri të Kosovës

Në një konferencë të jashtëzakonshme për shtyp, të mbajtur në QKUK, zëdhënësi i Policisë së Kosovës Arbër Beka ka dhënë lajmin se polici i plagosur gjatë ditës së sotme në veri, ka ndërruar jetë.

Enver Zymberi, pjesëtar i forcave speciale të Policisë së Kosovës – ROSU, ka vdekur në orët e mbrëmjes, në Qendrën Klinike Universitare të Kosovës.

Ai nuk ka mundur t’iu përballojë plagëve të rënda në kokë, që kishte marrë nga snajperët serbë, sot në veri të Kosovës, dhe ka vdekur rreth orës 22 e 10 minuta.

Enver Zymberi (1979) nga Dubovci i Vushtrrisë, ishte pjesëtar i njësisë ROSU nga vitit 2000. Ai ka lënë gruan dhe tre fëmijë.

Kryeministri Hashim Thaçi ka ngushëlluar familjen e të ndjerit me një telegram ngushëllimi, ku çmon lartë sakrificën e policit të vrarë.