NATO dhe SHBA-ja kërkojnë zgjidhjen e kontestit të emrit

NATO dhe SHBA-ja kanë bërë thirrje për zgjidhjen e kontestit të emrit, pas vendimit të Gjykatës Ndërkombëtare të Hagës, që vendosi në favor të Shkupit.

Vendimi i GJND-së shpalli Greqinë fajtore lidhur me shkeljen e Marrëveshjes së Përkohshme të vitit 1995, duke bllokuar anëtarësimin e Maqedonisë në NATO në samitin e vitit 2008.

Sekretari i përgjithshëm i NATO-s, Anders Fog Rasmusen, ka deklaruar se Maqedonia do të ftohet përsëri për t’iu bashkuar NATO-s, pasi ta zgjidhë kontestin për emër me Greqinë.

“Kjo nuk ka efekt në vendimin e aleatëve të NATO-s në samitin e Bukureshtit në vitin 2008”, ka theksuar Rasmusen, raporton INA.

Kurse SHBA-ja përmes ambasadorit të saj në Shkup, Pol Volers gjithashtu ka përsëritur mesazhet se qëndrimi i NATO-s është i njohur.

“Tani është koha e vërtetë që liderët e Maqedonisë dhe Greqisë të bëjnë përpjekje plotësuese dhe të zgjidhjen kontestin e emrit. Qëndrimi i NATO-s është i njohur. Maqedonia mund të bëhet anëtare, kur do të zgjidh kontestin e emrit”, ka theksuar ambasadori amerikan në Shkup, Pol Volers.

Sipas tij, vendimi i Gjykatës së Hagës është një shans për liderët politik të dyja vendeve të shfrytëzojnë mundësinë dhe sërish të përforcojnë përpjekjet për të zgjidhur problemin.

Ndërmjetësi i OKB-së për emrin, diplomati amerikan Metju Nimic ka vënë në pahë se vendimi i Hagës duhet të shihet si një nxitje për të zgjidhur problemin e emrit.

Ai ka shprehur gatishmërinë për të vijuar procesin e negociatave për të gjetur një zgjidhje sa më të shpejtë, shkruan INA.