Moska e shqetësuar për “trajnimin” e luftëtarëve sirianë në Kosovë

© Ambasadori i Rusisë në OKB, Vitalij Çurkin

Ambasadori i Rusisë në OKB, Vitalij Çurkin ka theksuar në Këshill të Sigurimit se vendi i tij është i shqetësuar për njoftimet se kryengritësit sirianë po trajnohen në Kosovë.

Ai ka thënë se nëse këto raporte janë të vërteta, prania e luftëtarëve sirianë në Kosovë do të minojë përpjekjet ndërkombëtare për të rivendosur paqen në Siri.

Çurkin ka theskuar se duke e kthyer Kosovën në një qendër ndërkombëtare të trajnimit për kryengritësit e njësive të ndryshme të armatosura, ajo kthehet edhe një faktor serioz destabilizues që shkon përtej rajonit të Ballkanit.

Ministri i Jashtëm i Kosovës, Enver Hoxhaj, ka pranuar se Qeveria e Kosovës është në kontakt me opozitën siriane. Ai bëri të ditur se Kosova ishte ndër qeveritë e para në Evropë që mbështeti opozitën në Libi dhe në vendet tjera arabe, në vitin 2011, sepse “ne kemi luftuar për të njëjtat aspirata”.

Hoxhaj ka hedhur poshtë pretendimet se luftëtarët e opozitës siriane po trajnohen në Kosovë.