Miratohet Ligji kundër pjesëmarrjes në luftëra të huaja

Për miratimin e këtij ligji votuan 60 deputetë, 17 votuan kundër ndërsa 2 deputetë abstenuan. Ky ligj parashikon dënime deri 15 vjet burg për ata që marrin pjesë në luftë

Pas një debati të gjatë, Kuvendi i Kosovës miratoi të enjten mbrëma, Ligjin që ndalon pjesëmarrjen e qytetarëve të Kosovës në luftërat dhe formacionet e huaja. Ky ligj që parashikon dënime deri 15 vjet burg, për ata që marrin pjesë ose rekrutojnë persona për luftë, mund të jetë funksional pas dy javësh, sapo Ligji të nënshkruhet nga Presidentja dhe të dalë në gazetën zyrtare.

Për miratimin e këtij ligji votuan 60 deputetë, 17 votuan kundër ndërsa 2 deputetë abstenuan. Kundër u deklaruan kryesisht deputetët e Lëvizjes Vetëvendosje, të cilët kërkuan që këtij ligji t’i bashkohen edhe 9 amendamentet shtesë, që nuk sanksionojnë pjesëmarrjen eventuale në konfliktet e rajonit ku ka shqiptarë.

Deputetët e Vetëvendosjes thanë se nuk janë kundër këtij ligji por kundër emertimit të tij. Sipas Rexhep Selimit, deputet i Vetëvendosjes, ligji duhet të specifikohet si ligj që sanksion pjesëmarrjen në luftërat terroriste.

Ky Ligj u fut në rend të ditës me propozim të deputetit të AAK-së Daut Haradinaj, i cili kryeson Komisionin për Punë të Brendshme dhe Siguri. Sipas tij, ky Ligj është i qartë dhe ka për qëllim parandalimin e pjesëmarrjes së qytetarëve të Kosovës në konflikte jashtë vendit.

“Ky nuk është ligji më i miri në botë, por aktualisht në rrethanat në të cilat gjendet vendi është i domosdoshëm që të votohet nga deputetët e Kuvendit të Kosovës. Përmbajtja e Ligjit është parandalimi i njerëzve që t’u bashkohen organizatave të ndryshme, potencialisht terroriste”, ka thënë deputeti Haradinaj.

Ministri i Punëve të Brendshme, Skënder Hyseni, ka thonë se rreth 300 persona nga Kosova janë përfshirë deri më tani në luftë në Siri apo edhe në Irak. Organet e ndjekjes penale në Kosovë kanë konfirmuar se po zhvillojnë hetime nën dyshime për përfshirje në rastet që ndërlidhen me terrorizmin ndaj 135 personave.