Ministria e Drejtësisë ka kërkuar mosekstradimin e Shemsi Nuhiut në Serbi

Ministria e Drejtësisë e Republikës së Kosovës, nëpërmjet një komunikate ka njoftuar se në bashkëpunim dhe koordinim me Ministrinë e Punëve të Jashtme dhe Ambasadën e Kosovës në Bernë, kanë punuar lidhur me rastin e shtetasit kosovar, Shemsi Nuhiu, i cili ditë më parë është ekstraduar nga Zvicra në Serbi. 

Menjëherë pas marrjes se informatës lidhur me arrestimin e tij nga autoritetet zvicerane në bazë të fletë arrestit ndërkombëtar të lëshuar nga Serbia, për dyshimin e kryerjes se veprës penale ”Krime Lufte”, Ministria e Drejtësisë dhe Ambasada e Kosovës kanë kontaktuar me Departamentin për Drejtësi dhe Polici në Zvicër, për sigurimin e informatave më të detajuara lidhur me ketë rast.

Pas sigurimit të këtyre informatave, MD në kuadër të kompetencave dhe përgjegjësive të saj, iu është drejtuar me shkrese zyrtare më  28 prill 2011 autoriteteve zvicerane për të kërkuar që  Nuhiu mos të ekstradohet në Serbi. 

Po ashtu, MD ka argumentuar se Serbia nuk ka kompetence dhe të drejtë për të lëshuar  urdhër – kërkim ndërkombëtare kundër shtetasve kosovare, për dyshimin e kryerjes se veprave penale Krime Lufte në territorin e Republikës së Kosovës, pasi që kjo e drejtë hyn në kuadër të kompetencave dhe mandatit të autoriteteve kosovare, në rastet kur ka dëshmi se janë kryer krime lufte në Kosovë.

Ministria e Drejtësisë po ashtu me letrën e datës 10 janar 2012 i është drejtuar me shkrese Sekretarit Gjeneral te Interpolit, duke kërkuar marrjen e veprimeve përkatëse që këto urdhër-kërkime ndërkombëtare të lëshuara nga Serbia të mos kenë efekt.

Po ashtu, MD në konsultim të vazhdueshëm me Ambasadën e Kosovës në Bernë dhe me avokatin e Nuhiut, kanë kërkuar që të shqyrtohet edhe mundësia e transferimit të procedurës penale nga Serbia në Zvicër, në mënyrë që  Nuhiut t’i mundësohet një gjykim i drejtë.

Në vijim ne i kemi njoftuar autoritet kompetente që në bazë të nenit 5 parag. 5.1 pika (f) të Ligjit për Prokurorinë Speciale të Republikës së Kosovës, kjo Prokurori ka kompetence të veçantë që të hetojë dhe ndjekë penalisht të gjitha rastet e kësaj natyre dhe kjo prokurori ka qenë e angazhuar në vazhdimësi për krimet e dyshuara të kryera në territorin e Republikës së Kosovës, duke kërkuar transferimin e procedurës penale nga autoritet serbe.

Ministria e Drejtësisë  ka qenë e përkushtuar me kapacitetet e plota të saj në këtë rast dhe ka pasur kontakt të vazhdueshëm për të bashkëpunuar me autoritetet zvicerane, Ministrinë e Punëve të Jashtme të Kosovës dhe ambasadën e Kosovës në Zvicër, për mos ekstradimin e  Nuhiut në Serbi, thuhet në komunikatën e kësaj ministrie.