Më shumë para nga diaspora sesa investime

Deri në shtator 2011, vlera e dërgesave të emigrantëve arriti në 393 milionë euro, që paraqet një rritje vjetore prej 5 për qind

Gjatë vitit 2011 dërgesat e emigrantëve kanë shënuar rritje në 393 milionë euro, derisa investime të huaja janë bërë në vlerë prej 292.7 milionë euro, thuhet në Raportin e Bilancit të Pagesave në Bankën Qëndrore të Kosovës, i cili pasqyron zhvillimet kryesore në bilancin e pagesave të vendit.

Kjo tregon se më shumë se mbi 100 milionë euro, kanë ardhur në Kosovë remitanca nga diaspora sesa investime të huaja.

Për dallim prej disa vendeve të tjera të rajonit, Kosova ka vazhduar të shënojë rritje të dërgesave të pranuara edhe gjatë vitit 2011.

Kështu, deri në shtator 2011, vlera e dërgesave të emigrantëve arriti në 393 milionë euro, që paraqet një rritje vjetore prej 5 për qind”, ka thënë Gërguri. Këto të dhëna  të këtij raporti tregon se dërgesat e emigrantëve janë duke dhënë kontribut të rëndësishëm në rritjen e konsumit në Kosovë

Sipas Raportit të Bilancit të Pagesave, rritja e dërgesave të emigrantëve edhe gjatë kësaj periudhe në masë të madhe është si rezultat i asaj që pjesa më e madhe e dërgesave të emigrantëve në Kosovë vjen nga Gjermania dhe Zvicra, vende këto të cilat janë ndikuar më pak nga kriza e fundit.

Hulumtimet e bëra tregojnë po ashtu se pjesa më e madhe e dërgesave të emigrantëve në vend kanë për destinim financimin e konsumit të ekonomive familjare.

Autoritetet bankare në Kosovë kanë thënë se duke pasur parasysh potencialin mjaft të lartë financiar të emigrantëve kosovarë, duhet të bëhen përpjekje që mjetet financiare të emigrantëve të angazhohen në ekonominë e vendit edhe në formë të investimeve, gjë e cila do të siguronte një shfrytëzim shumë më produktiv të këtyre mjeteve, me mundësi për të rritur prodhimin dhe punësimin në vend.