Më shumë fluturime nga Gjermania për në Prishtinë

Kompania Germanwings do të ketë 14 fluturime në javë nga pika të ndryshme të Gjermanisë drejt Prishtinës

Më 1 nëntor 2011 kompania gjermane e aviacionit Germanwings shton numrin e fluturimeve të saj për në Prishtinë. Ky zgjerim vjen si rezultat i bashkëpunimit të saj me kompaninë Kosova Airlines.

14 herë në javë do të ketë fluturime, siç thuhet, me çmime të volitshme, nga pika të ndryshme të Gjermanisë drejt Prishtinës dhe pritet një vëllim udhëtarësh prej 200 mijë në vit, shkruan portali austrianwings.at.

Me planin e ardhshëm dimëror të fluturimeve do të bëhen tri fluturime në javë nga Shtutgarti, Dyseldorfi dhe Munihu si dhe nga një herë në javë nga aeroportet e Hamburgut, Këln/Bonit, Frankfurtit, Berlin-Schönefeldit dhe Hanoverit.