Më pak vepra penale të paraqitura

Rënie veçanërisht të madhe kanë shënuar numri i dhunimeve seksuale (18%) dhe ai i veprimeve të dënueshme seksuale me fëmijët (26%)

Gjatë vitit 2010 policisë zvicerane i janë paraqitur më pak delikte se një vit më parë. Sipas shënimeve statistikore që ka prezantua  dje, Enti Federal për statistika, gjatë vitit 2010 janë regjistruar 656`858 vepra penale, që është për 2 për qind më pak se gjatë vitit 2009.

Mirëpo, ndërkohë që është shënuar një rënie në numrin e përgjithshëm të veprave penale, numri i vrasjeve gjatë vitit 2010 është shtuar për 2%, shkruan portali i Televizionit Publik Zviceran  SF1.

Rastet e ushtrimit të dhunës në përgjithësi janë pakësuar për 6% ndërsa ato të ushtrimit të dhunës së rëndë, kanë rënë madje, për 12%.

Rënie veçanërisht të madhe kanë shënuar numri i dhunimeve seksuale (18%) dhe ai i veprimeve të dënueshme seksuale me fëmijët (26%).

Deliktet me narkotikë janë shtuar për 4%. Ndërsa ka rënë për 8% numri i të miturve të fajësuar për ndonjë vepër penale.

Sa i përket vendqëndrimit të kryerësve të veprave penale, statistikat e fundit tregojnë se 80% e tyre jetojnë në Zvicër, 4% vijnë nga meset e azilkërkuesve dhe 15 % janë turistë kriminelë. Gjithsej zviceranë janë 63% të të paditurve ndërsa të huaj janë 37%.